ԻՐԱԶԵԿՈՒՄ ԵՎ ՆԱԽԱԶԳՈՒՇԱՑՈՒՄ

Հարգելի՛ տնտեսավարողներ,

Վերջին ժամանակահատվածում ՀՀ քաղաքաշինության, տեխնիկական և հրդեհային անվտանգության տեսչական մարմինը պարբերաբար ստանում է ահազանգեր և բողոքներ այն մասին, որ անհայտ ծագմամբ և կասկածելի գործունեություն ծավալող ԱՁ, ՍՊԸ և ՓԲԸ կարգավիճակ ունեցող տարբեր ընկերությունների ներկայացուցիչներ, կիրառելով ապակողմնորոշիչ մեխանիզմներ, այցելում են հասարակական, արտադրական, առողջապահական և այլ նշանակության բազմաբնույթ օբյեկտներ և չունենալով հրդահային անվտանգության ոլորտում գործունեություն ծավալելու համապատասխան լիցենզիա՝ իրականացնում են ոչ իրավաչափ գործողություններ.

Մասնավորապես՝

▪️Պատասխանատու հիմնարկներից անհիմն կերպով պահանջում են գնել հրշեջ-տեխնիկական միջոցներ (մասնավորապես՝ կրակմարիչներ), իսկ առկա միջոցները ներկայացնում են հրդեհային անվտանգության նորմերով սահմանված չափանիշներին չհամապատասխանող,

▪️Տնտեսավարողներին հորդորում են ստորագրել և կնքել իրավական հիմքերից զուրկ, ոչ իրավաչափ պայմանագրեր կամ այլ փաստաթղթեր։

▪️Վերոնշյալ ապօրինի ծառայությունների կամ պարտադրված գույքի դիմաց պահանջում են չհիմնավորված ֆինանսական միջոցներ՝ շահարկելով պետական մարմնի կողմից տուգանքների կամ պատժամիջոցների կիրառման սպառնալիքը։

Հորդորում ենք ցուցաբերել առավելագույն զգոնություն և չտրվել նմանատիպ խարդախություններին ու հոգեբանական ճնշումներին։

Տեսչական մարմինը հորդորում է նմանատիպ խնդրի բախվելու դեպքում անհապաղ դիմել իրավապահ համակարգի մարմիններին։